Archiv der Kategorie: 3. Dr Schorsch vrzählt

Nr. 217: Dr Schorsch vrzählt vom 20. Juli 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Des war scho a rechte Steißgeburt. Doch jetzt dürfet mir ons ohsennig freue, weil seit gestern isch’s a bschlossene Sach’, en der Landeshauptstradt gibt’s bald a „Äffle- ond Pferdle“-Ampl. Allerdengs isch di schwäbisch Variante’ von den dene hübsche Ampla en Sondrausgabe doch a bissle armseelig, weil so ganz hât mr sich doch net druf einlassekönna. So wird’s di „Äffle- ond Pferdle“-Amp bloss als Âhängsel – so zu saga als Zwoitampl – neba ra „richtiga“ Fußgängrampl geba. Mir em Ländle send halt scho ohvrschämt korrekt ond gsetzbuch treu. Em rheinland-pfälzischa Mainz send se dâ lässigr. Seit 23. November 2016 gibt’s nämlich dort a Mainzelmännchen-Ampl, ohne nomâl a richtiges Leuchtwerk drneba. En Emden henn se sich au schwer doa mit „Otifanta“-Ampla mit dem Komiker Otto Walkes gmâlte Figürle. Dr Otifant hât sich net durhsetza kenna, abr emmrhin gibt’s bald vier Ampla mit ma stilisierte Otto Walkes.

A guate Woch’ ond em Herrgott sein Sega.

Nr. 216: Dr Schorch vrzählt vom 13. Juli 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Ach, wia herrlich isch’s en Jugenderinneronga zom schwelga. Was für an entscheiden’r Tag isch dr 14. Juli 1969 für – jâ mr kâ sâge fascht für’s ganze weitere Leba – gwä? An dem Tag isch nämlich „Easy Rider“ en d’Kino komma. Anarchie hât sich plötzlich breit gmacht, obwohl mr als Halbwüchsigr tatsächlich net amol gwisst hât, was des isch. Ond plötzlich hat mr sich so ohglaublich rebellisch gfühlt, oifach „Borne to Be Wild“, au in dr beschaulicha schwäbischa Provinz.

Mr hât’s Taschegeld gspart, drmit s’Fahrrädle an Banana-Sattel kriagt (mit „Überrollbügl“, was des Uffsteiga recht kompliziert gmacht hât), ond au an Hochlenkr, was dia Vrkehrssicherheit kaum vrbessert hât. Mr war plötzlich dr Wyatt mit em Zwoirad „Captain America“ vom Stammheimer Ehniweg. An dr Fahrradgabl-Verlängerong isch mr allerdings damâls jämmerlich gscheitert. Ond au dr „Mardi-Gras-Karneval“ war en dr Provinz ehr fad.

A guate Woch’ ond em Herrgott sein Sega.

Nr. 215: Dr Schorsch vrzählt vom 6. Juli 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Zemlich vrückt gâht’s en onserer Welt zua. S’isch grad egal wonah mr nâ glotzt, en onser direkts kommunalpolitisch’s Omfeld, verstärkt em Europaparlament ond dromrom, ond ganz extrem, wenn mr übr dr große Teich guckt. Mr könnt’ zu Vielem jetzt Manches sage.

Dr Schorsch empfiehlt jetzt abr, lasset mr ons doch die prächtig’ Sommerzeit net vrgraula. Grad an dem Wochenend’ gibt’s so viele schöne Festle bei ons, mit ohsennig viel Musik, mit viele Ehraamtliche, dia am Grill, hendr dr Thek’ odr uff de Bühna standet ond ons vrwöhna wellat, ond mit beste Gelegeheita zom ma Schwätz’ mit Freind ond Bekannte, dia mr scho lang nemma troffa hât. Genießa mr jetzt oifach dr sprichtwörtliche Augablick, die Sorga ond Nöt’ sollet ons oifach gern hann.

A guate Woch’ ond em Herrgott sein Sega.

Nr. 214: Dr Schorsch vrzähl vom 29. Juni 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dr Schorsch isch schwer vrwirtt. S’werdet Milliona von Euros ausgeba, drmit dia CO2-Emissiona von de Autos kloiner werdet. Des hört sich natürlich klimatechnisch prima â. Bloss welche Auswirkonga des hann soll, des erschließt sich so ma oifacha Gmüat wia am Schorsch net. Onser Luft zom Schnaufa setzt sich aus 21 Prozent Saurstoff ond etwa 78 Prozent Stickstoff zamma. 0,97 Prozent send Edelgas’ ond letztendlich 0,03 Prozent Kohladioxid (CO2). Wia mr nâchlesa kâ send dia CO2-Emissiona 2017 en Deutschland om 344 Milliona Tonna gsonka. Dia Auswirkonga beim ma Luftâteil von 0,03 Prozent send scho echt bemerkbar. Odr etwa net?

A guate Woch’ ond em Herrgot sein Sega.

Nr. 213: Dr Schorsch vrzählt vom 22. Juni 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Arg vrwirrt isch dr Schorsch. Jetzt hât doch tatsächlich dr Europäische Grichtshof vrfügt, dass mir en Deutschland koi Autobâh-Maut vrlanga dürfet. Onsr Plänle, von dene, wo uff onsere Autobâhne a Nutzongsgebühr zom verlange, isch scheint’s diskriminierend. So sehet’s onsere österreichische Nâchbr net, dene mir seit viele, viele Jâhr emmer wiedr gern ihre Vignettla abkaufet. Des hoißt also, Österreicher, Italiener, Spanier odr Franzosa dürfet ons Deutsche weiter diskriminiera. Oh seeliges EU-Recht, wer kâ di vrschtanda?

A gute Woch’ ond em Herrgott sein Sega.

Nr. 212: Dr Schorsch vrzählt vom 15. Juni 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dr Schorsch muss heut‘ ennerlich Abbitte leista, weil heut gâht‘s om dr Fraufußball. Bisher isch für ihn des Kicka von dene Weibr – wia für viele – oifach wia „Pferderenna mit Esel“ gwä. Jetzt abr woiß dr Schorsch, die Bundeskickerinna brauchet koine Oir, weil se nämlich Pferdeschwänz henn. Ond nâch dem WM-Kick gega dia Spanierinna muass mr âerkennend sage, des war schon klasse, wia die deutsche Mädle sich neighängt henn, kämpft bis zum Omfalla ond dia elegante Kickerinna von dr iberischa Halbinsel mit purem Willa gschlaga henn. Dr Schorsch isch jetzt a Âhänger von dr bundesdeutscha Frauanationalmannschaft ond er freut sich, wenn onsre Mädla em Endspiel, was se obedengt erreicha müssat, dene Ami-Menschla zeigat, wo dr Bartel dr Most holt.

Irgendwia scho komisch en dr heutige Zeit, älle männliche Sportmannschafte, wo dr Schorsch mâg, wia Fußball, Handball ond Eishockey en onsera Gegend send zwoitklassig, bloss dia Mädle (Hanball) send erschtklassig.

A guate Woch‘ ond em Herrgott sein Sega.

Nr. 211: Dr Schorsch vrzählt vom 8. Juni 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

En dr letzschta Wochâ hât sich dr Schorsch übr dia Arroganz em Internet ausglassa, jetzt mussâr sich drfür einsetza, dass mr dia Möglichkeite vom weltweite Netz nüzta sott, om dr Dialekt zom schütza. Es isch doch tatsächlich, wia onder anderm dr Bayrische Rondunk vrmeldet hât, passiert, dass a Kindergartatante em ma obrpfälzischa Kendergarta a Kendle bleed gmaßrregelt hât, weil des Kendle â “Wurschtbrot” statt lutherdeutsch “Wurstbrot” gsagt hât. Ja, wo semmer denn? Mr müsst richtig spreche und es müsst schließlich jedr vrstânda, was a Kendle sagt, so di Krampfhenna von Erzieherin.

Dem “Bund Bairische Sprach  e.V.” hâts jetzt zugrecht dr Vogl nausghaua, ond er gâht uff dBarikada. Di Dialektvereinigong fordert jetzt drzua uff: “Wer Fälle von Verächtlichmachungen unserer Muttersprache kennt, soll sich an uns wenden. Wenn es möglich ist, machen wir die Verfehlungen bekannt.”

Mir als Dialektschützer müsset d obedengt solidarisch sei ond selbschtbewusst, konsequent ond leidaschaftlich onsern Dialekt pflega. Dâmit kämpfet mir gegen dia vraltete Irrlehr aus den 70er-Jâhr, wonâch Dialekte dr schulische Erfolg von de Kendle hemmat dätet. Richtig isch vielmehr, des Schwätza vom ma Dialekt erhöht langfristig des Sprâchvrmöga von de Kendr.

A guate Woch’ ond em Herrgott sein Sega

Nr. 210: Dr Schorsch vrzählt vom 1. Juni 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Di Arroganz em weltweita, elektronischa Netz wird für dr Schorsch langsam oherträglich. Ond di entzwischa ohverhüllte Moinungsmacherei au. Jedr, wo zwoi vrständliche Sätz’, wenn au mit viele Fehlr behafftet, vrfassa kâ, moint net bloß er müsst’ sein oft zehmlich hirnlosa Lohkäs’ vrbreita, viele moinat außrdem sia hättet Weißheit mit Löffel gfresse ond dürftet andere nâch Belieba kritisiera – arrogrant ond vor ällem völlig respektlos. Jetzt werdet übr dr CDU-Chefin Annegret Kramp-Karrenbauer oimrweis hässlich-hämische Bemerkonga nondrgleert. Net weil se irgendwelcha politischa Krampf rausgschwätzt hât, sondern weil se per Fax (!) in dene moderne Zeita Mitglieder zur ra Sitzong eiglade hât.

Dâ kâ mr dene Internetheinis bloss so an richtig gemeina Internetvirus an dr Krage wünsche, na dätet se schnell merka wia sicher so a Versand mit em guata alte Telefax isch.

A guate Woch’ ond em Herrgott sein Sega.

Nr. 209: Dr Schorsch vrzählt vom 27. Mai 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Worom kommt am Schorsch en dene Tag dr Friedrich von Schiller en dr Senn? „Es kann der Frömmste nicht in Frieden bleiben, wenn es dem bösen Nachbar nicht gefällt“, hoißt’s em vierte Akt, dritt’ Szene vom Wilhelm Tell. Mmh? Ganz bestimmt liegt’s an dene Wahla zom Europa-Parlament am Sonntich. Ond sichrlich liegt’s dâdra, weil mir älle obedingt ebbes drfür doa müssat, drmit Europa des bleibt, was s’jetzt scho lang isch. Nämlich dr Grundstoi drfür, dass dia ondrschiedlichste Kerle ond Mädle sich möget ond respektiera, ond sich nemma d’Schädel eischlaget, wia des bloss zwoi Generationa frühr no gwä isch.

Es isch eigentlich a irre Gschicht: Dr entzwischa aluminiumblonde Schorsch hât en seim ganze Lebe no koin Krieg erlebe müssa. Des isch net selbschtvrständlich, ond natürlich hofft’r druff, dass des au no seine Kendeskender so erleba dürfet.

A guate Woch’ ond em Herrgott sein Sega.

Nr. 208: Dr Schorsch vrzählt vom 18. Mai 2019

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Fascht a ganz’ Jâhr hat sich’s dr Schorsch verkniffa ebbes übr dr Fußball zom schreiba. Bekanntlich isch dr Schorsch jâ seit frühestr Kendheit Âhänger von dene Kickr mit dem rota Bruschtreng. Ond bekanntlich hât’s in dere Bundesliga-Saison wirklich next Schreibenswert’s geba. Bloss bruddla ond jammra, des hât dr Schorsch nâ au net wella. Heut’ gibt’s guate Nâchrichta. Am Spätnâchmittag stâht fescht, wer di Moistrschüssel hochheba därf, ond nâ isch Schluss mit dere Männr-Kickerei. Bloss onser VfB der darf als Erschtligaverei no zwoimâl kicka. Des isch doch prima odr. Na freuat mir ons uff onsere National-Kickerinnen. Ihr wisset scho, des send dia wo „keine Eier brauchet“, weil se „Pferdeschwänz’“ henn.

A guate Woch’ ond em Herrgott sein Sega.